Синоптиктердің желтоқсан айының басына арналған ауа райы болжамы

«Қазгидромет» синоптиктері 2017 жылдың 1-4 желтоқсан аралығына арналған ауа-райы болжамын жариялады, деп хабарлайды «Медиа-Астана» сайты «Қазгидромет» РМК сайтына сілтеме жасап.

Күнтүзбелік қыс келді, бірақ қысқы ауа райы кешігіп келуде. Демалыс және мереке күндері Қазақстанның басым облыстарының кей жерлерінде аздаған қар күтіледі, ал ауа температурасы бұрынғысынша климаттық мөлшерден   3-5 градус жоғары.

Тек республиканың оңтүстігінде биік циклонның әсерінен жауын-шын болжанады, ауа температурасы 1-2 градус төмен болады. Түнгі және таңертенгі сағаттарда республиканың басым бөлігінде тұман сақталады, оңтүстікте көктайғақ болжанады.

Сондай-ақ, Қазақстан аймақтарында 2017 жылғы 6 желтоқсанда болатын ерекше метеорологиялық құбылыстарға болжау жасады. 

Атмосфералық фронттардың өтуіне байланысты кей жерлерде қар, желдің күшеюі, тұман, көктайғақ сақталады.

Ақмола облысының кей жерлерінде тұман, жаяу бұрқасын, желдің 15-20 м/с күшеюі күтіледі. Батыс Қазақстан облысының кей жерлерінде көктайғақ, бұрқасын,  желдің 15-20 м/с күшеюі күтіледі. Қостанай облысының кей жерінде тұман болып, желдің 15-20 м/с күшеюі күтіледі. Маңғыстау, Ақтөбе облыстарының кей жерлерінде жел 15-20 м/с күшейеді, Маңғыстау облысында екпіні 23 м/с жетеді. Жамбыл, Оңтүстік Қазақстан, Атырау облыстарының кей жерлерінде тұман, көктайғақ болады, Атырау облысының кей жерлерінде жел 15-20 м/с күшейеді.

Алматы, Қызылорда, Солтүстік Қазақстан, Павлодар, Қарағанды, Шығыс Қазақстан облыстарының кей жерлерінде тұман болады.